गजल

अञ्जानमा छु’को मात्रै लात कहाँ लाग्यो ?

बोतल अझै बाँकी नै छ मात कहाँ लाग्यो ?

व्यर्थ किन ढाँट्छस् मलाई अबेर भयो भनी

भर्खर घाम ढल्कँदैछ रात कहाँ लाग्यो ?

सीतन पनि धेर भो’ भन्छस् खाली प्लेट देखाउँदै

दुइ–चार वटा त रित्तिए नि खात कहाँ लाग्यो ?

पैसा तैँले तिर्ने भा’ पो बिल चाहे जति आओस्

फिर्ता पैसा धरी मेरो हात कहाँ लाग्यो ?

रक्सीले जात कहीँ चिन्छ ? भड्काउन नखोज मलाई

पिउने बाहुनलाई मतवालीको जात कहाँ लाग्यो ?

सँधै भट्टी धा’को छैन बेला–बखत त पिउने हो नि

यो ‘धिरु’लाई जड्ँयाहाको बात कहाँ लाग्यो ?

 याक्दुहाङ्ग धिरज

रानीवास : ५, भोजपुर

हाल : विराटनगर